کوهستان سرد الیگودرز  ( الیگوئرز )

اصل ونسب :

مُونِه گون بختياري بَخت ، يارُم

زِ ايچُو تا به كُورش ريشِه دارُم

دژِ قلبُم قَوي چي دژِ مُنگشت

فِراخ سينه چَن شيمبار تا دَشت

چُونو خينُم زلالِه ،  مثل كارُون

موخُو پاك ويَه رَنگم جُور بارُون

مو واكورِش دوتامُون زِ يَه ايليم

دوتامُون شاخ وبَلگ يَه چَويليم

دوتامُون خُورزماريم زِ يَه خينيم

دوتامُون بَچَل ايران زِمينيم

خُوم وكُورش ز نَسل يَه پيائيم

دوتائيمون ز ايل آريائييم

خُوم وكورش ز يَه كُر و بووئييم

ايما يا تاته زائيم يا گووئييم

ز داريوش بِگوم سيت زِ يه نَسليم

دوتامون آريائي اصل اصليم

مو واسورِنا نِهال يَه دِرختيم

دوتامون جِنس پولاديم ، سَختيم

مو واپرويز خُسرو ز يَه طافيم

دوتامون جور گندم مِن يه بافيم

مُو وا كاوِه دوتامُون زِ يَه خاكيم

هَنيم هَم دِشمِن جُون ضَحاكيم

فِريدُونيم وبائيمون قَوينِه

سر وجُونمُون فداي سر زِمينه

مُو چي زَرتُشت وا شَو ايكُن�م جَنگ

اگِزنُوم جُور بَرقِ بَردِ هوشنگ

سياوَش گُونه خينُم ايزَنه جُوش

نَبيدِه داغِ سُهراوُم فِرامُوش

مُو بيزارُم زِ هَرچي شيلِه پيلَه

اِجنگُوم وا ريا ومَكر وحيله

بَرُم تاجِ  ز ماوين دوتا  شير

اِگِروم گُوش شيرِ مينِه نَخچير